مالبه رى سه ره كى

الجمعة، 18 فبراير 2011

به‌یاننامه‌ی مه‌كته‌بی سیاسی یه‌كێتیی نیشتمانیی كوردستان له‌باره‌ی رووداوه‌كه‌ی سلێمانیه‌وه‌

هاوڵاتیانی به‌شه‌ره‌فی كوردستان
دووای نیوه‌ڕۆی ئه‌مڕۆ 17/2/2011 ژماره‌یه‌ك له‌ هاووڵاتیان له‌به‌رده‌ركی سه‌رای سلێمانی كۆبوونه‌وه‌یه‌كیان ئه‌نجامدا كه‌ پێشوتر له‌ رێی پارێزگاری سلێمانیه‌وه‌ مۆڵه‌تی ئه‌و كۆبونه‌وه‌یه‌یان وه‌رگرتبوو كه‌ شوێن و كاته‌كه‌ی دیاریكراو بوو، هه‌رچه‌نده‌ هه‌ر له‌دوای ده‌ستپێكردنی كۆبوونه‌وه‌كه‌ ژماره‌یه‌كی زۆر دروشمی توندوتیژ و هاندان بۆ كاری تێكده‌رانه‌ به‌رز ده‌كرایه‌وه‌ و ده‌وترانه‌وه‌.
سه‌رئه‌نجام له‌ كۆتایی كۆبوونه‌وه‌كه‌دا ئاراسته‌ و ئامانجی كۆبوونه‌وه‌كه‌ له‌شوێنی رێگه‌ پێدراوی خۆی گۆڕدرا و به‌ره‌و گێره‌شێوێنی و ئاژاوه‌گێڕی برا و چوونه‌ به‌رده‌می لقی 4 ی پارتی دیموكراتی كوردستان و بینای مه‌كته‌بی رێكخراوه‌ دیموكراتیه‌كانی یه‌كێتیی نیشتمانیی كوردستان ره‌فتاری نامه‌ده‌نیانه‌ و گێره‌شێوێنانه‌یان نواند به‌تایبه‌ت به‌رامبه‌ر باره‌گای لقی پارتی هاوپه‌یمانمان و هه‌روا ئه‌یانویست هه‌ڵبكوتنه‌ ناو باره‌گاكه‌ و ئازاری كادران و پاسه‌وانانی بده‌ن، پاسه‌وانانی لقیش ناچاربوون به‌رگری له‌خۆیان بكه‌ن و به‌داخه‌وه‌ له‌ ئه‌نجامی په‌ره‌سه‌ندنی رووداوه‌كه‌دا ژماره‌یه‌ك له‌هێرشبه‌ران بۆسه‌ر لقی چوار بریندار بوون و خۆپیشانده‌رێكیش گیانی له‌ده‌ستدا.

هاووڵاتیانی خۆشه‌ویست
به‌ لاڕێدا بردنی كۆبوونه‌وه‌ی جه‌ماوه‌ری مۆڵه‌تپێدراو و بردنی به‌ره‌و گێره‌شێوێنی و ئاژاوه‌، هه‌میشه‌ مه‌ترسی ئه‌وه‌ی لێ ده‌كرێ كه‌ وه‌ك رووداوه‌كه‌ی ئه‌مڕۆ كاره‌ساتی لێ بكه‌وێته‌وه‌ و ئارامی و ئاسایشی وڵات تێك بدا و ژیان و كاسبی هاووڵاتیان بخاته‌ به‌رده‌م مه‌ترسییه‌وه‌، بۆیه‌ پێویسته‌ له‌م رووداوه‌دا حكومه‌تی هه‌رێم به‌په‌له‌ لیژنه‌یه‌ك پێك بهێنێ بۆ دۆزینه‌وه‌ی ئاژاوه‌ گێڕان و بردنیان بۆ به‌رده‌م یاسا، وه‌ك چۆن داواش له‌ هاووڵاتیان ده‌كه‌ین له‌م قۆناغه‌دا خۆیان له‌ هه‌ر جۆره‌ كۆبوونه‌وه‌یه‌ك و خۆپیشاندانێك به‌ دوور بگرن و هاوكاریی هێزه‌ ئه‌منییه‌كان بكه‌ن بۆ دۆزینه‌وه‌ی هه‌ر ده‌ستێك كه‌ له‌پشت گۆڕینی رێڕه‌وی كۆبوونه‌وه‌كه‌بێ.

هاووڵاتیانی كوردستان
حزب و لایه‌نه‌ سیاسییه‌كان و رێكخراوه‌كانی كۆمه‌ڵگای مه‌ده‌نی و ده‌زگاكانی راگه‌یاندن.
به‌داخه‌وه‌ كه‌ بارودۆخه‌كه‌ ئه‌م ئاڵۆزییه‌ی به‌خۆوه‌ بینی، بۆیه‌ داوا له‌ هه‌موولایه‌ك ئه‌كه‌ین، كه‌ هۆشیارانه‌ و كوردستان ویستانه‌، مامه‌ڵه‌ له‌گه‌ڵ ئه‌و بارودۆخه‌ هه‌ستیاره‌ بكه‌ین و هه‌موومان پێكه‌وه‌ هه‌وڵ بده‌ین و به‌ گیانی پاراستنی یه‌كڕیزی گه‌له‌كه‌مان و ئه‌زموونه‌كه‌ی هاوكار بین و رێگه‌ نه‌ده‌ین بارودۆخه‌كه‌ ئاڵۆزترببێت و كاره‌سات و قوربانی تری لێبكه‌وێته‌وه‌، با هه‌موومان به‌ گیانی كوردانه‌ و به‌ په‌رۆشه‌وه‌ برایه‌تی گه‌له‌كه‌مان بپارێزین و له‌هه‌موو ئاكار و گوفتارێك دووربكه‌وینه‌وه‌ كه‌ رق و كینه‌ و توڕه‌یی لێ به‌رهه‌م بێ.

مه‌كته‌بی سیاسی
یه‌كێتیی نیشتمانیی كوردستان
17/2/2011

به يانامه يك اه سه روكى هه ريمه وه سه باره ت به رووداوه كى ئه مروى شارى سليمانى

به‌ ناوی خوای گه‌وره‌ ومیهره‌بان
وا دیاره‌ ئه‌مڕۆ پێنج شه‌ممه‌ 17/2/2011 هێرش كراوه‌ته‌ سه‌ر باره‌گای لقی (4)ی پارتی دیموكراتی كوردستان له‌ شاری سلێمانی و له‌ ئه‌نجامدا كوژراو و برینداری لێ كه‌وتۆته‌وه.
بێگومان ئه‌وه‌ی روون وئاشكرایه‌ كه‌ دوژمنانی گه‌لی كوردستان به‌رده‌وامن له‌سه‌ر نانه‌وه‌ی فیتنه‌ و ئاژاوه‌گێڕی، به‌ڵام خه‌ڵكی كوردستان هوشیار و به‌ ئاگان و گشت پیلان و نه‌خشه‌ی گڵاوی ناحه‌زان پووچه‌ڵ ده‌كه‌نه‌وه‌ و له‌پێناو پاراستنی ئه‌زموون و ده‌ستكه‌وته‌كانی هه‌رێمی كوردستان رووبه‌ڕووی هه‌موو ئاشووب وهه‌ڕه‌شه‌یه‌ك ده‌بنه‌وه.
داوا له‌ هه‌موو لایه‌ك ده‌كه‌ین هێمنانه‌ مامه‌ڵه‌ له‌گه‌ڵ رووداوه‌كه‌ بكه‌ن و ئارامیی كوردستان بپارێزن و داوا له‌ حكومه‌تی هه‌رێمیش ده‌كه‌م به‌ زووترین كات لیژنه‌یه‌كی لێكۆڵینه‌وه‌ پێكبێنی بۆ به‌دواداچوونی رووداوه‌كه‌و دۆزینه‌وه‌ی تاوانباران و ئه‌وانه‌ی له‌ پشت نانه‌وه‌ی ئه‌م فیتنه‌یه‌ بوون، بۆ ئه‌وه‌ی به‌ زووترین كات تاوانباران بدرێنه‌ دادگا و به‌ سزای عادیلانه‌ی خۆیان بگه‌ن.
هه‌روه‌ها داوا له‌ گه‌لی كوردستان و حكومه‌تی هه‌رێمی كوردستان ده‌كه‌م كه‌ به‌ ئه‌ركی سه‌رشانی خۆیان هه‌ڵبستن و هێزه‌ ئه‌منییه‌كانیش كۆنترۆڵی ته‌واوی بارودۆخه‌كه‌ بكه‌ن و باره‌گای سه‌رجه‌م حزب و هێز و لایه‌نه‌كان و داموده‌زگاكانی حكومه‌ت بپارێزن، له به‌رئه‌وه‌ی به‌هیچ شێوه‌یه‌ك رێگا ناده‌ین فه‌وزا و فیتنه‌ و ئاژاوه‌گێڕیی له‌ كوردستان سه‌رهه‌ڵبداو ئه‌من و ئاسایشی هه‌رێم و ژیان و گوزه‌رانی هاووڵاتیانی كوردستان بكه‌وێته‌ مه‌ترسییه‌وه.
له‌ كۆتاییدا ده‌ڵێم كه‌ ته‌بایی و یه‌كڕیزیی گه‌لی كوردستان مایه‌ی به‌دیهێنانی ده‌ستكه‌وتی گه‌وره‌ بوون، بۆیه‌ ئه‌مڕۆ ئه‌ركی هه‌مووانه‌ ئه‌م یه‌كڕیزییه‌ بپارێزن، راشیده‌گه‌یه‌نین كه‌ به‌ توندیش رووبه‌ڕووی هه‌ر هه‌ڕه‌شه‌یه‌ك ده‌بینه‌وه‌ بیه‌وێ زه‌ره‌ر به‌ كه‌شی سه‌قامگیری كوردستان و به‌رژه‌وه‌ندییه‌كانی گه‌لی كوردستان بگه‌یه‌نی.

مه‌سعود بارزانی
سه‌رۆكی هه‌رێمی كوردستان
17/2/2011

هه رددو مه كته بى سياسى ى.ن.ك و ب.د.ك كوده بنه وه

ئه‌مڕۆ 18-2 هه‌ردوو مه‌كته‌بی سیاسیی یه‌كێتیی نیشتمانیی كوردستان و پارتی دیموكراتی كوردستان كۆبوونه‌وه‌یه‌كی هاوبه‌شیان ئه‌نجامداو دوای كۆبوونه‌وه‌كه‌ش به‌یاننامه‌یه‌كی هاوبه‌شیان بڵاوكرده‌وه‌ كه‌ ئه‌مه‌ی خواره‌وه‌ ده‌قه‌كه‌یه‌تی.
جه‌ماوه‌ری خۆشه‌ویستی كوردستان
رۆژی 17-2 ژماره‌یه‌ك ئاژاوه‌گێڕ له‌شاری سلێمانی بۆ شێواندن و له‌باربردنی ئه‌و كه‌ش و هه‌وایه‌ هێمنه‌ی كوردستان و دروستكردنی بارودۆخێكی ناله‌بار كه‌ كاریگه‌ری هه‌بێ له‌سه‌ر بواری كۆمه‌ڵایه‌تی و ئاشتی كۆمه‌ڵایه‌تی بخه‌نه‌ مه‌ترسییه‌وه‌، هه‌روه‌ها بواری ئابوری و بازاڕی كوردستان به‌شێوه‌یه‌ك نیشانبدرێ كه‌ ترس و دڵه‌ڕاوكێ له‌ نێو بارزگان و وه‌به‌هێنه‌ران دروستبكات له‌ڕووی سیاسییه‌وه‌ ناسه‌قامگیری نیشانی ناوخۆو وڵاتانی بیانی بده‌ن، به‌پیلانێكی پێشوه‌خته‌ په‌لاماری باره‌گای لقی ٤ ی پارتی دیموكراتی كوردستانیاندا به‌نیازی بێ حورمه‌تی پێكردن و سوتاندنی كه‌ به‌داخه‌وه‌ له‌ ئاكامی ئه‌م په‌لاماره‌ی ئاژاوه‌گێڕاند ژماره‌یه‌ك خه‌ڵك له‌ ناو باره‌گای لقی ٤ و سه‌ر جاده‌ كوژران و بریندار بوون.
له‌ڕوانگه‌ی به‌خه‌مه‌وه‌ بوون و پاراستنی سه‌روماڵی هاووڵاتیان و به‌رقه‌راركردنی ئه‌منییه‌ت، داوا له‌حكومه‌تی هه‌رێمی كوردستان ده‌كه‌ین ڵێكۆڵینه‌وه‌ی وردو جدی له‌م بابه‌ته‌ بكات و ئه‌وانه‌ی پیلانیان داڕشتووه‌و ئه‌وانه‌ی بۆنه‌ته‌ ئالییه‌تی ئه‌و پیلانانه‌و ئه‌م ئاژاوه‌یان له‌شاری خۆشه‌ویستی هه‌ڵمه‌ت و قوربانی دروستكردو بوونه‌ هۆی ناڕه‌حه‌تی و دڵه‌ڕاوكێی جه‌ماوه‌ری كۆڵنه‌ده‌ری شاره‌كه‌ راده‌ستی یاسا بكات و سزا بدرێن.
كۆبوونه‌وه‌ جه‌ختی له‌ هاوهه‌ڵوێستی و یه‌كڕیزیكرده‌وه‌ بۆ ئه‌وه‌ی له‌ سایه‌ی ئه‌م هاوهه‌ڵوێستی و یه‌ك ریزییه‌دا ئاوات و ئامانجه‌ ره‌واكانی گه‌له‌كه‌مان بێته‌دی، له‌ كاتێكدا كه‌ بارودۆخی كوردستان و ناوچه‌كه‌ له‌باره‌ بۆ پاراستنی ده‌ستكه‌وته‌كان و به‌دیهێنانی ئه‌و ئاوات و ئامانجانه‌ی تا ئێستا به‌دی نه‌هاتوون، ده‌بێ رێگا نه‌ده‌ین روداوه‌كان به‌ئاڕاسته‌یه‌كدا به‌رن كه‌ به‌زیانی گه‌له‌كه‌مان بێت.
داواش له‌حكومه‌تی هه‌رێمی كوردستان ده‌كه‌ین له‌ ئه‌دای به‌رپرساتی داموده‌زگا په‌یوه‌نداره‌كان لێكۆڵینه‌وه‌ بكات و ئیجرائاتی پێویست وه‌ربگرێ،  داوا له‌ جه‌ماوه‌ری خۆڕاگرو كورد په‌روه‌ری شاری سلێمانی و هه‌موو كوردستان ده‌كه‌ین هاوكاری داموده‌زگا ئه‌منییه‌كان بكه‌ن بۆ به‌رقه‌راری ئه‌من و ئاسایشی هاووڵاتیان و پاراستنی سه‌روه‌ت و سامانیان.
هه‌روه‌ها جه‌ماوه‌رو یه‌كێتیی نیشتمانیی و پارتی دیموكراتی كوردستان و گشت لایه‌نه‌ سیاسی و رێكخراوه‌كانی كۆمه‌ڵگای مه‌ده‌نی رێگا نه‌ده‌ن ناحه‌زان و پلانگێڕان درز بخه‌نه‌ نێو یه‌ك ریزی و ته‌بایی نێو ماڵی كوردستان، ده‌بێ پیلانگێڕان ئه‌وه‌ بزانن بۆ پاراستنی ئه‌زموون و ده‌ستكه‌وته‌كانی گه‌لی كوردستان رێگه‌و شوێنی پێویست له‌به‌ر چاو ده‌گیرێت.

مه‌كته‌بی سیاسی یه‌كێتیی نیشتمانیی كوردستان                                     
مه‌كته‌بی سیاسی  پارتی دیموكراتی كوردستان                     
18ی شوباتی 2011